Նույնականացման քարտ ստանալու համար պետական տուրքի վճարումից ազատվում են նաև առաջին անգամ նույնականացման քարտ ստացող ՀՀ այն քաղաքացիները, որոնք 16 տարին լրանալուց հետո չեն ստացել ՀՀ քաղաքացու անձնագիր: Այս մասին տեղեկանում ենք ոստիկանության Անձնագրային և վիզաների վարչության պետ Մնացական Բիչախչյանից։
«Հիշեցնում ենք, որ նույնականացման քարտը որպես անձը հաստատող փաստաթուղթ կարող է օգտագործվել ՀՀ-ում ցանկացած բնագավառում։ Որևէ մարմին իրավասու չէ մերժելու գործարքը՝ նույնականացման քարտի փոխարեն պահանջելով անձնագիր։
Նույնականացման քարտը ունի մի շարք առավելություններ.
- այն ամենօրյա կրելու դեպքում առավել հարմարավետ է,
- առավել դիմացկուն է,
- պարունակում է նաև հանրային ծառայությունների համարանիշ. ամեն անգամ ՀԾ համարանիշ պահանջվելու դեպքում քաղաքացին ստիպված չի լինի դիմելու և ստանալու համապատասխան տեղեկանք,
- էլեկտրոնային կառավարման բնագավառում հանդիսանում է անձի նույնականացման համար միակ վստահելի փաստաթուղթը»,-նշել է նա։
